■ III Día de la Llingua Llïonesa
L'asociación puntuLLI participóu autivamente y cumu collaboradora na celebración del III Día de la Llingua Llïonesa entamáu pula Conceyería de Cultura Llïonesa del Conceyu de Llión, organismu que ficiera n'esta edición un especial apueste pulas nuevas teunoloxías y pul oxetivu en comuña d'algamar un domiñu propiu pa las páxinas web que tean dientru de la diáspora de la nuesa cultura y el nuesu idioma.
Esti III Día de la Llingua Llïonesa desendolcouse al traviés d'un espaciu de charla virtual creyáu cul envís de facilitar el sigimientu de las ponencias que fonun llevadas a cabu a lu llargu de la tarde d'avientu y 30, 2009.
En concretu cuatru fonun los alcuentros virtuales que tuvun llugar, de los cualos especificamos darréu tantu l'horariu cumu'l conteníu:
· 10:00 - Entamu a cargu del Conceyeiru d'Educación, Cultura Llïonesa y Nuevas Teunoloxías, Abel Pardo Fernández.
· 12:00 - Mesa Redona: El Llïonés na alministración llocal , sólu pa empleyaos del Conceyu de Llión.
· 16:00 - La Llingua Llïonesa y la costrución de páxina web, a cargu de Xairu Llópez, diseñador de páxinas web en llingua llïonesa.
· 18:00 - La Llingua Llïonesa y l'asociacionismu, a cargu d'Adrianu Martín, presidente de l'Asociación Berciana en Defensa de la Llingua Llïonesa "El Toralín".
· 20:00 - L'ensiñu de la Llingua Llïonesa n'adultos, a cargu d'Héctor Villazala, presidente de l'Asociación de la Llingua Llïonesa "El Fueyu".
· 22:00 - Llingua Llïonesa guei: autualidá y programas de futuru, a cargu d'Abel Pardo Fernández, Conceyeiru d'Educación, Cultura y Nuevas Teunoloxías del Conceyu de Llión.
La participación n'estos alcuentros fou desenrollada al traviés del software MSN Messenger y n'eilla participonun más de cuatrocientos internautas en defensa tantu del nuesu idioma cumu del sou dreichu a cuntare cun un domiñu propiu na Rede.
|
